內地林場--百年惠蓀實驗林場

台灣唯一無偎海的縣市是南投縣，埔里嘛是咱的國土中心。所以幾年前一寡少年人為著欲拍出南投的名號，佇遐辦音樂會的時，海報大大寫著內地音樂會，所以我就提內地做標題用。下跤這首華文詩描寫伊的大概狀況。惠蓀林場以早叫做能高林場，因為中興大學湯惠蓀校長的關係才改做惠蓀這个名。欲去會經過國姓二一省道的一部份，閣斡入去縣道投80，照縣道一直駛就到了。柑(竹敢)仔店到底愛用佗一字網路有真濟討論，揣一下連咱國家駐日大使謝長廷的面冊嘛有講著喔！

內地林場

二一省道越國姓  惠蓀蜿蜒投八零

能高林場更名日  興大立碑湯公亭

柑仔店旁草原青  藍鵲現踪山嵐徑

涉水石梯聲潺潺 遠眺必登杜鵑嶺

新中退休人員遊琉璃橋

前幾冬真出名的屏東三地門的琉璃橋，定定聽講人揳揳揳。最近較無這種情形了，所以綴退休聯誼會出遊。

轉踅琉璃橋

傳說屏東琉璃橋  新中退休來𨑨迌

路過奇美覽古物 台南byke騎無著

原民舞蹈青年保  達悟勇士美女搖

瑪家三地隘寮溪  回程加行二吊橋

田尾菁芳園--老同學嘛是老朋友的朋友開的

昨昏去彰化田尾菁芳園，當場佇遐潦草寫出下跤這首華文詩。老同學陳志仁經由面冊看著來line講，彼是伊的朋友巫頭家開的。台灣誠細，真濟所在連來連去攏有關係。是毋是請志仁同學轉予(亻因)朋友巫頭家作廣告用呢！

菁芳園遊趣

冬日煦陽欲瞌睡  菁芳園遊趨田尾

屋頂採光蘭園吸  落雨松樹池畔圍

下午茶趣品三回  提拉米蘇配咖啡

竹科行行看看咧--台灣矽谷

查仔囝佇新竹讀交通大學，媠某一二個就欲去新竹揣伊。這是一冬前的代誌了，想起來記踮遮。

遊靜心湖

靜心湖畔金山寺  鯽仔歡喜泅蓮池

樟腦苦苓箍湖邊  暗光鳥群歇樹枝

遊客飼魚我吟詩  某囝丈姆遊湖去

舊年一首台文詩－抺烏戰術

人若年紀漸漸濟，一寡想欲做的代誌有時陣會袂記去。親像久無見的同學仝款，一時間想袂起伊的名。收集台文詩佇遮有一个好處，無免四界揣東揣西，毋過三不五時仔嘛將舊年愛鋪的詩到今仔日才想著，誠實是老罔老喙閣會哺土豆。

抺烏戰術

國黨一一拍宇昌  綠營英文受重傷

司法判決愛賠償  正副主席攏激戇

若是抺烏繼續用  一六選票真兩光

彰化一日簡單遊

彰化高鐵田中有一个庄頭有一間廟叫做旨臨宮，庄內有貓村藝術。大村有一个若七美雙心石滬仔。溪州三春有一欉老樹，下跤稻仔是彩色的。花壇鄉出名的茉莉花是車頭入口意象藝術品啦！

彰化庄跤踅

田中旨臨窯燒貓  大村雙池腹肚枵

三春老樹種彩稻  茉莉花壇踅翻頭

台灣退將參加中國孫文紀念會

2016年11月11日中國舉辦孫文紀念會，咱台灣退休軍將足濟人嘛驚綴無著，前後講有60幾粒星呢！這毋知是啥乜情形？小小一首台文詩描述社會攏總的看法，因為押韻的文章寫作詩會較好記，嘛較有留傳落來的價值，所以本部落岫儘量用詩辭的方式來記錄。

糞埽退將像
中國孫文紀念會  台灣退將參加濟
聽訓近平歷史說  中華民國掃落地
義勇軍曲國歌廻  全體徛起唱咧綴
國親講是才合禮  百姓目睭金金擘

遊箔仔寮港

箔仔寮港是雲林上大的漁港，嘛有一寡貨運功能，是台灣本土離澎湖上近的港口。最近台灣鯛名氣漸漸起來，是四湖口湖地區出名的所在。這首華文詩做一个小小的記錄。

遊箔子寮港
雲林漁港箔子寮
吳郭蛻變台灣鯛
港邊風車轉綠電
夕陽餘暉映海釣

新港駁岸行走記錄

北港溪岸新港段自早以來干焦有駁岸，並無休閒運動的功能。這幾年來漸漸注重了後開始整修予鄉民會當行路欣賞風景兼運動。古民段早就配合媽祖入口意像做好了，板頭厝窯庄段草嘛有處理。賰中庄後庄這段最近鋪紅毛土了，但是猶未完全處理好勢就有人開始去遐運動了。

行走溪圳岸

新港古民修駁岸  上尾完成中庄段

東石支線沿岸行  北爿蓮池水鳥看

笨港溪水高鐵迒  車道兩爿稻芳滿

小歇後庄夯頭看  窯庄日頭拄落山

洪習會側記－綜合各媒體新聞記錄

洪秀柱目前是公認上弱的國民黨主席，為著欲顧全明年黨主席選舉繼續掌控黨中央，真自然愛將黨的歷史傳承落去，按呢才有正統的地位保持藍軍軍頭的口號通喝。下跤這首詩是華文詩，毋是平常所發的台文詩。

記洪習會

秀柱進京去討賞  隨行媒體全姓黨

孫文陵前中華泣  訴說民國已實亡

行前巨頭槓舌槍  不知民意已轉向

同表各表皆一中  唯爭促統山寨王

嘉油鐵馬道風景色

黃昏鐵馬道
桃城嘉油鐵馬道
沿路岸跤栽弓蕉
水道蓮花迵瓦厝
道將圳邊水車趒
黃昏水上日半落
北回火車來映照

天頂吊橋－南投景點值得踅

幾冬前南投彰化接界的所在建立一座吊橋，橋跤是半線管區，半線是彰化古早名。遠遠的所在是高鐵經過襪仔出名的社頭鄉，斟酌看拄好高鐵車班經過。

澎湖查仔囝吳怡芳－管家婆通人呵咾

吳怡芳來自澎湖，冊讀無濟只到高中。但是伊自學紙黏土，藝術涵養袂䆀，飼翁教囝功夫一流。小小一首咱台灣詩描述管家的情形。

台灣版手機仔字體進步情形

中國正體字恬恬咧影響咱台灣，太約舊年冬若前去手機仔店踅踅咧，發現除了apple以外大部份的手機所用的字體是中國標準。昨昏閣去嘉義市內看一遍，改用台灣正體標準的公司進步囉。LG5 ，samsung 7 edge , sony , 甚至俗仔機華碩zenfone 3嘛綴著了。國內中國機大廠htc出太濟機仔，伊的A10,Desire 825嘛改用台灣標準了。

九三年金遊行小小的意見

9月初3有一部份的軍人教師佮公務員欲行向街頭，表達(亻因) 這一寡人的訴求，要求政府18%袂使振動留予時間去解決。毋過嘛有真濟軍公教身份的人支持年金政策愛改，加上愛人攑刀刣家己的肉，閣要求伊袂使喝疼是誠無合理的代誌，所以本人支持氣袂敨的人攏去參加九三大遊行。希望因為上街頭氣敨敨咧較爽快，無定著遊行了後顛倒講確實愛改囉！

年金改革行

九三遊行軍公教   講人抺烏歹聲嗽

信賴保護掛喙頭   顧全利益藏嚨喉

予伊行行氣敨敨   國家機會顧年少

千行百業怨懟消   公教尊嚴真正到

這个日子愛記咧--全國教師進修網綴會著時代

　　前一站向進修網建議是毌是會當將秀面的flash提掉，得著的回應是考慮中。想袂到昨用無flash插件的瀏覽器去看竟然會當用囉！
　　其實進修網一向攏有咧進步，早期連odf都無法度傳，我馬上共高師大反應。經過幾個月就無問題了。佇遮共高師大講一聲勞力，予物聯網手機應用閣較緊進步。

以早紛紛擾擾的事件

這首華文詩是記錄大約18,9冬前的小可代誌。彼時陣有一个竹崎來的人事主任，因為處理代誌方法無蓋好，加上一寡相關條件的配合，造成申訴來來去去用欲一冬的時間。人行過跤跡拭袂掉，頭殼無好緊寫落來較袂袂記，全文記錄佇下跤：

源兄竹崎遠道來

作客六嘉幾寒暑
同事權益或稍忘

如今重回故鄉土

當思六中幾多事

永不復有起爭逐

全國教師在職進修網研習名單處理問題

　　報名老師名單匯出的時，是xls格式檔案。佇linux用 file Members.xls看的時是html utf8檔案，但是用libreoffice開的時雖然會當選正體中文，但是無效，開出來也是亂碼。將伊的附檔名改做html，囥入去瀏覽器選utf8編碼才ＯＫ。毌知有啥乜方法會當改善無？予libreoffice會當順利開出來。小小問題有勞高師大了解看覓！

高根深主任退休贈送華文詩一首

　　這是幾落冬前的代誌了，佇蒜頭服務誠久的時間，彼時陣主任是高根深老師。逐家作伙足久嘛真有感情。就佇我離開蒜頭大概2冬左右伊退休，想起前輩服務30若冬攏佇蒜頭，簡單寫下跤這首華文詩祝伊退休：
　　贈根深主任
　　卅幾年前已拓根
　　六嘉學子受惠深
　　如今榮退心感念
　　祈能再造蒜頭恩

玉山銀行的網路ATM可能落伍了

幾冬前，玉山銀行是國內第一間支援linux系統使用網路銀行的銀行。彼時陣感覺伊是對linux使用者上友善的公司。最近firefox的版本升甲足緊，可能玉山的跤步有一點仔綴袂著，我佇linux用上新的firefox掠伊的webatm plugin來安裝，煞出現下跤的資訊：
netbank.esunbank.com.tw The add-on downloaded from this site could not be installed because if appears to be corrupt。
這確實有一點仔使人失望，毌知玉山銀行有接著反應無？其他的銀行嘛猶無支援linux系統，可見國內資訊環境猶有達咧改進的所在。
　　後來，佇網路頂懸揣著解法，是將pxi解開了後掠so檔案囥入去mozilla的plugin資料夾內面就ＯＫ了，誠實按呢做真正會當用囉，所以只要拍拼認真用網路也是無毌著啦！

有自造者精神的自定系統--archos

軟體自由協會協助教育部製作ezgo系統幾落冬了，一直是徛佇ubuntu系統頂懸來發揮上大的功能，嘛得著新北市的全市採用的肯定。archlinux是閣較有自造者精神的系統，完全予使用者自定家己欲愛的功能，但是愛有淡薄仔linux經驗才有法度好好仔安裝。佇遮我裝好一个輕便的系統，只要揣一粒8G以上的隨身碟，就會當試看覓。提供予有趣味的朋友試用。
網路地址佇遮 ，掠落來了後解開，閣將伊寫入去隨身碟就ＯＫ了。

恭賀台灣脫胎換骨的日子來到

雙詩同齊發佈，囥佇仝一个圖內面。５月明仔載是520，嘛是新政府上台的日子。雙詩代表二次執政嗎？無啦！凊彩講講咧啦！

未來教育展nknu自造者基地大受歡迎

　　昨佇華山文創園區是教育部主辦的未來教育展覽，高師大科技學院林鴻銘院長領軍的自造者教育團隊嘛插一跤。想袂到連天下雜誌文字記者嘛來採訪欲一點鐘的時間，可見nknu自造者偌受歡迎。國教院發足濟邀請函予各地方人士，真濟教育界有頭有面的人物攏來到本攤參詳合作的方式。附圖是天下雜誌文字記者佮院長對話。

台南關仔嶺梅嶺遊記

３月初是真好天的日子，假日通常是出去𨑨迌啦！四界行行咧心情較快活嘛較輕鬆，隔轉工欲上班會閣較有力，親像是食著歐羅肥仝款。
下跤是簡單台文詩句記錄：
台南雙嶺行
台南溫泉關仔嶺
水火同源相爭看
嶺頂公園桂花巷
好漢坡路毌敢行
東山咖啡瑪哩食
梅峰古道行梅嶺
步道梅樹滿山坪
日頭落山照西影

南台灣0206地動記

0206彼一工，我人拄好佇中國廈門。經由小三通到中國是第一遍，三更半暝當著地動感覺怪怪，一時間毌知是地動。透早起來當地民眾有咧談論，但是無啥確定。中山公園散步食早頓了後轉來酒店共服務員問起確定是中國本土沿海地區嘛有感受著。

sumproduct佇試算表內面的表現

最近拄著一个問題，是ODF推廣碰著的。送ODF檔案予教育處的辦事員，講伊拍袂開這个檔案。若照國發會的推動時程來講，是袂使拒絕收這个檔案的。所以只好請伊改參數寫法，參數的說明佇下跤：
sumproduct是試算表內面真好的函數，做統計的時一定用會著的。伊的參數佇calc內面真簡單，只是用逗號隔開爾爾。但是佇excel內面就無好紡矣，單單一个參數竟然愛乘1，二个參數嘛愛用星號乘起來，是毌是穿衫泅水呢（多此一舉）？

新港作醮唪

百年作醮奉天宮
舞台起佇祖先墓
魯冰花曲來獻唱
嘉縣國小詩歌王
創藝供品求興旺
跨年煙火媽祖像
兒童歌手佮千玉
祈求一六國運昌